അതിരൂപതയിൽ ദിവ്യബലിമധ്യേ ദിവ്യകാരുണ്യം നൽകുന്ന സന്യസ്തരുടെ പഠനക്ലാസ് 12-ാം തീയതി ശനിയാഴ്ച വെള്ളയമ്പലം ആനിമേഷൻ സെന്ററിൽ വച്ച് നടന്നു. അതിരൂപത ചാൻസിലർ മോൺ.സി. ജോസഫ് പരിശീലന ക്ലാസ്സ് ഉത്ഘാടനം ചെയ്തു സംസാരിച്ചു. ദിവ്യകാരുണ്യഭക്തിക്ക് വളരെയധികം പ്രാധാന്യം നൽകിയിരുന്ന ജനങ്ങളുടെ മനോഭാവത്തെ തന്റെ ബാല്യകാലാനുഭവങ്ങളിൽനിന്ന് ഓർത്തെടുത്തുകൊണ്ട് എന്തുമാത്രം ഭക്തിയോടെയാവണം ദിവ്യകാരുണ്യം നല്കുന്ന ദൗത്യം നിറവേറ്റേണ്ടതെന്ന് മോൺ. സി. ജോസഫ് സന്യസ്തരെ ബോധ്യ പ്പെടുത്തി.
‘ദിവ്യബലി: ഒരു ആമുഖപഠനം” എന്ന വിഷയത്തെ ആസ്പദമാക്കി മോൺ നിക്കോളാസ് ടി. ക്ലാസെടുത്തു. അതിരൂപത മെത്രാപ്പോലീത്ത ഡോ. തോമസ് ജെ. നെറ്റോ മുഖ്യപ്രഭാഷണം നടത്തി. മറ്റുള്ളവരിൽ യേശുവിനെ കാണാൻ നമുക്ക് കഴിയണമെന്ന് ഓർമ്മിപ്പിക്കുകയും, ദിവ്യകാരുണ്യത്തെക്കുറിച്ച് പഠിക്കാൻ കത്തോലിക്കാ സഭയുടെ മതബോധനഗ്രന്ഥം ഉപയോഗിക്കണമെന്നും ആവശ്യപ്പെട്ടു.
“ദിവ്യബലിയും മറ്റ് കൂദാശകളും – സജ്ജീവ പങ്കാളിത്തം” എന്ന വിഷയത്തെ ആസ്പദമാക്കി ശുശ്രൂഷ കോർഡിനേറ്റർ ഫാ. ലോറൻസ് കുലാസും, “കൂദാശകളുടെ പ്രായോഗിക വശങ്ങൾ” എന്ന വിഷയത്തെ ആസ്പദമാക്കി അജപാലന ശുശ്രൂഷ ഡയറക്ടർ ഫാ. ഷാജു വില്ല്യവും ക്ലാസുകൾക്ക് നേതൃത്വം നല്കി. രാവിലെ 9:30 മുതൽ ഉച്ചയ്ക്ക് ശേഷം 03.30 വരെ നടന്ന ഏകദിന പരിശീലന ക്ലാസ്സിൽ 9 ഫെറോനകളിൽ നിന്നായി 81 സന്യസ്തർ പങ്കെടുത്തു.