കഴക്കൂട്ടം മേനംകുളം മരിയൻ ആർട്സ് ആൻഡ് സയൻസ് കോളേജിൽ നവാഗതരെ സ്വാഗതം ചെയ്ത് അതിരൂപത സഹായമെത്രാൻ ഡോ. ക്രിസ്തുദാസ് ആർ. 2023-24 അധ്യയന വർഷത്തിൽ പുതുതായി ചേർന്ന വിദ്യാർത്ഥികളുടെ പ്രവേശനോത്സവം ഉദ്ഘാടനം ചെയ്തുകൊണ്ടായിരുന്നു അവരെ സ്വാഗതം ചെയ്തത്.
സ്വപ്നം കാണണമെന്നും ആ സ്വപ്നത്തിനായി സ്ഥിരോത്സഹത്തോടെ പ്രയത്നിക്കണമെന്നും, സ്വപ്നം കാണുന്നവർക്ക് മാത്രമേ ഉന്നതങ്ങളിലേക്ക് ഉയരാൻ സാധിക്കുകയുള്ളൂവെന്നും, മുന്നിലുണ്ടാകുന്ന പ്രതിസന്ധികളെ തരണം ചെയ്തു വീണ്ടും മുന്നോട്ടു നീങ്ങാനുള്ള ശക്തിക്കായി സർവ്വേശ്വരനോട് പ്രാർത്ഥിക്കണം എന്നും സഹായ മെത്രാൻ നവാഗതർക്ക് സന്ദേശം നൽകി.
136 വിദ്യാർത്ഥികളും അവരുടെ മാതാപിതാക്കളും പരിപാടിയിൽ പങ്കെടുത്തു. മാനേജർ ഫാ. പങ്ക്രേഷ്യസ് അധ്യക്ഷത വഹിച്ച യോഗത്തിൽ പ്രിൻസിപ്പൾ ഡോ. ഫ്രാൻസിസ് സണ്ണി സ്വാഗതവും, ബർസാർ ഫാ. വർഗീസ് നന്ദിയും പറഞ്ഞു. വരും ദിവസങ്ങളിൽ പുതിയ വിദ്യാർത്ഥികൾക്കായി അഞ്ച് ദിവസത്തെ ഓറിയന്റേഷൻ ക്ലാസുകൾ നൽകുമെന്നും കോളേജ് മാനേജ്മെന്റ് അറിയിച്ചു.
