ലത്തീൻ അതിരൂപത അധ്യക്ഷൻ തോമസ് ജെ നേറ്റോ മെത്രാപ്പൊലീത്തയെ വത്തിക്കാന്റെ ഇന്ത്യൻ സ്ഥാനപതി പാലിയം ഔദ്യോഗികമായി അണിയിച്ചു. വൈകുന്നേരം 4 മണിക്ക് പാളയം സെന്റ് ജോസഫ്സ് കത്തീഡ്രലിൽ വച്ച് നടന്ന ദിവ്യബലി മധ്യേയാണ് ആർച്ച് ബിഷപ്പുമാരുടെ സ്ഥാനിക ചിഹ്നമായ പാലിയം ഔദ്യോഗികമായി അണിയിച്ചത്.
തിരുവനന്തപുരം പ്രോവിൻസിലെ മറ്റുരൂപതകളായ കൊല്ലം രൂപതാ അദ്ധ്യക്ഷൻ പോൾ മുല്ലശ്ശേരി,ആലപ്പുഴ മെത്രാൻ ജെയിംസ് ആന പറമ്പിൽ, നെയ്യാറ്റിൻകര രൂപത അധ്യക്ഷൻ വിൻസന്റ് സാമുവൽ, പുനലൂർ മെത്രാൻ സിൽവസ്റ്റർ പൊന്നു മുത്തൻ എന്നിവരും ആർച്ച് ബിഷപ്പ് എമിരിറ്റസ്. ഡോ. എം. സൂസപാക്യം, എമിരിറ്റസ് ബിഷപ്പ് സ്റ്റാൻലി റോമൻ സഹായമെത്രാൻ റൈറ്റ് റവ. ഡോ. ക്രിസ്തുദാസ് പിതാവും പങ്കെടുത്ത ദിവ്യബലിയ്ക്ക് ആർച്ച് ബിഷപ്പ് മോസ്റ്റ് റവ. ഡോ. തോമസ് ജെ നെറ്റോ മുഖ്യ കാർമ്മികത്വം വഹിച്ചു. ഇന്ത്യ-നേപ്പാൾ രാജ്യങ്ങൾക്കുവേണ്ടിയുള്ള വത്തിക്കാൻ പ്രതിനിധി ആർച്ച് ബിഷപ്പ് ലിയോപോൾഡോ ജിറേല്ലിയാണ് പാലിയം കഴുത്തിലണിയിച്ചത്.
കഴിഞ്ഞ ജൂൺ 29-ന് സെന്റ് പീറ്റേഴ്സ് ബെസിലിക്കയിൽ നടന്ന ദിവ്യബലിക്കിടയിൽ ലോകമെമ്പാടും നിന്നെത്തിയ നിരവധി മെത്രാപ്പൊലീത്തമാർക്കൊപ്പമാണ് തിരുവനന്തപുരം അതിരൂപതാധ്യക്ഷൻ മോസ്റ്റ് റവ. ഡോ. തോമസ് ജെ. നെറ്റോ ഫ്രാൻസിസ് പാപ്പയുടെ പക്കൽനിന്നും പാലിയം കൈകളിൽ സ്വീകരിച്ചത്. മെത്രാപ്പൊലീത്തമാർ തങ്ങളുടെ പ്രവിശ്യയിമേലുള്ള ഭരണാധികാരത്തിന്റെ പ്രതീകമായി ഉപയോഗിക്കുന്ന പാലിയം അണിയിക്കുന്ന ചടങ്ങ് അതാത് രൂപതകളിലാണ് നടക്കുക. അതിരൂപതയിലെ വൈദികർ, സന്യസ്തർ ഇടവക പ്രതിനിധികൾ ചടങ്ങിൽ പങ്കെടുത്തു.